BAGUIO CITY – Naballigi ti maika-walo a general assembly ti Cordillerans in Mindanao wenno CorMinda a grupo dagiti Cordillerans nga agnanaed ita sadiay Mindanao.
Iti eksklusibo a panakiyuman ti Bombo Radyo kenni Dr. Jonathan Bayogan, presidente ti CorMinda ken OIC ti Compostela Valley State College, kinunana a bigbigbigenda ti nagtaudanda a Cordillera ken sipapanakkelda a mangibaga a dagitoy ket Igorot.
Impettengna a saanda a kayat a mapukaw ti identity dagitoy, pakairamanan dagiti annakda kas Igorot wenno Cordillerans isut gapuna a maysa a wagas tapnu masalimetmetdanda ti nasao nga identity ket ti panangipreserbada iti cultural heritage a nabangonan dagitoy babaen iti panagtalinaed ti koneksion wenno komunikasyonda iti tunggal maysa.
Naisayangkat ti maikawalo a CorMinda General Assembly iti barangay hall ti Bannawag, Kabacan, North Cotabato idi napalabas a Sabado, December 7 ken nagserbi a host dagiti kailyan a kameng ti Bago Tribe.
Dimmar-ay ditoy ti agarup 350 a Cordillerans manipud New Corella ken Tagum sadiay Davao del Norte; Tacul, Kapatagan ken Digos sadiay Davao del Sur; Toril, Downtown ken Tagurano ti Davao City ken dadduma pay a paset ti Mindanao.
Nagbalin a tampok iti general assembly ti panagragragsak ken ditoy nga impannakkelna nga adda dagiti second generations a Cordillerans a saan a naipasngay ditoy rehion nga adda dagiti maka-ammo a talaga nga agsala ken agay-ayam iti gangsa.
Sigun pay kenni Dr. Bayogan, dakkel a tulong ti panagtartaripnong dagiti Cordillerans sadiay Mindanao ket maam-ammuan a sumagmamano kadagiti nangangato a posisyon sadiay Mindanao ket ukopado dagiti Cordillerans.
Imbingay ni Dr. Bayogan a kangrunaan a napagsaritaan ken napagnumuan iti taripnongda ti panangbukelda iti resolusyon a mangipeksa iti suportarda iti naipila a Cordillera Autonomous Region Bill sadiay Kongreso.
Kinunana a napusgan ti abogado a miembroda a mangisagana iti nasao a resolusyon a mangipeksa iti panangsuportar ti CorMinda iti panakaipasa ti nasao a gakat.
