BAGUIO CITY – Impaganetget ti Bureau of Fire Protection- Cordillera a ti laeng probinsia ti Kalinga ti napalubosan ken naipaayan iti permit tapno aglako kadagiti paputok ken pailaw ditoy rehion.
Imbinglay ni Senior Fire Officer 1 Leo Mendoza, Public Information Officer ti BFP-Cordillera daytoy ket gaputta ti laeng Kalinga ti pakasarakan kadagiti otorisado ken legal a paputok ken pailaw.
Kinunana a karaman ditoy ti baby rocket, bawang, small triangulo , L-diablo, kwitis ken small rockets.
Iti baet daytoy, imbalakadna a sakbay a maipatungpal ti community fireworks display ket nasken nga agalada pay iti clearance manipud iti munisipyo ken iti city hall malaksid pay ti fireworks permit nga alaenda met iti estasion ti BFP.
Nasken met nga umadayo dagiti tattao manipud iti nakaipatayaban ti fireworks gaputta dakes ti epekto ti asok ken ti napigsa nga uni a mapataud dagiti pailaw.
Sigun pay iti opsisial, agtaltalianaed a maiparit ti panaglako kadagiti paputok ken pailaw a kas iti piccolo , super lolo, atomic triangle, large judas belt, large bawang, posa , watusi, goodbye philippines, whistle ken atomic bomb gaputta naglaon dagitoy iti kemikal a makapadakes iti salun-at ti maysa nga indibidual.
