BAGUIO CITY- Dinutukanen ni House Speaker Pantaleon Alvarez ni Kalinga Rep. Allen Jesse Mangaoang kas ‘caretaker congressman’ ti Mountain Province a nabakante-an kalpasan ti ipupusay daydi Rep. Maximo Dalog Sr. idi napalabas a bulan.
Agserbi ni Mangaoang kas kongresista ti Montañosa iti unexpired term daydi Dalog agingga iti eleksion inton 2019.
Kinunana met a karit ken dayaw ti panakapilina kas caretaker ti Mt. Province nangruna ta nanayonan ti responsibilidadna.
Nupay kasta, agtalek daytoy a matungpalna dagiti responsibilidadna gaputa agasideg laeng dagiti dua a probinsia ken agpada dagiti pakaseknan dagitoy isut gapuna nga awan unay ti pakabannoganna. Impatalgedna a saan a marigatan daytoy la ketdi para iti pagsayaatan ti Kalinga ken Montañosa.
Impeksa pay ni Cong. Mangaoang ti panagyamanna iti pamilya daydi Cong. Dalog ken kadagiti umili ti Mt. Province a nangiyendorso iti naganna iti liderato ti administrasyon.
Naamuan a daytoy ti maikadua a gundaway nga adda ti kongresista ti Kalinga a nadutukan kas ‘caretaker congressman’ ti Montañosa.
Maipalagip nga idi February 2008, pimmusay met daydi Mt. Province Representative Victor Dominguez ken dinutukan ti Kamara ni sigud a Kalinga Representative Manuel Agyao kas caretaker ti nasao a probinsia agingga iti eleksion idi May 2010
