BAGUIO CITY – Nairikepen dagiti amin a borders wenno kalsada a sumrek ken rumwar ditoy siudad, nangrugi idi kalman.
Sigun kenni Mayor Benjamin Magalong, saanen a mabalin a sumrek ditoy siudad dagiti non-essential travellers, pakairamanan dagiti taga-Baguio a napupuk iti dadduma a lugar.
Mailaksid iti pammilin dagiti taga-Benguet nga addaan ti napateg a transaksion ditoy Baguio ken dagiti agbibiahe kadagiti taraon, agas ken dadduma nga essential items.
Inlawlawag ni Mayor Magalong a babaen iti nasao nga addang ket maipasigurado ti panakaprebentar ti panagwaras ti COVID-19 ditoy siudad nangruna ta iti report dagiti health officials ket awan ti local transmission ditoy lokalidad.
Innayonna a dagiti positibo a kaso ti COVID-19 a nailista ti Baguio ket dagiti indibidual a nagbiahe kadagiti lugar nga addaanen ti positibo a kaso to COVID-19.
Agpaut ti nasao a travel ban iti las-ud ti dua a lawas.
Kagiddan iti daytoy, iyap-apela manen ni Mayor Magalong ti kooperasyon ken panaka-awat ti publiko iti nasao a pammilin.
