![](https://img.bomboradyo.com/baguio/2022/07/WEDDING-1.jpg)
BAGUIO CITY – Pagsagsaganaan ita ti Philippine Military Academy ti umadanin a kallaysa da Olympic Gold medalist Hidilyn Diaz ken ti coach-na a ni Julius Naranjo.
Daytoy ket kalpasan a napili ti St. Ignatius Chapel of the PMA iti Fort Del Pilar, Baguio City kas venue ti seremonya.
Iti interview ti Bombo Radyo Baguio, kinuna ni LTC Mark Anthony Ruelos, panakangiwat ti PMA, mangrugi ti seremonya iti alas tres ti malem.
Kinunana a nainget a mabantayan ti aglawlaw ti akademya iti nasao nga aldaw nangruna ta manamnama ti isasangbay dagiti high profile individual.
Impettengna a nainget a masurot dagiti COVID-19 health protocols nu sadino nasken a mangiparang dagiti amin a bisita iti vaccination card.
Dinakamatna a tallo pulo ket walo ti inisyal a bilang dagiti principal sponsors a naiyuman kadakuada ngem iberberipikar da paylaeng nu dumar-ay amin dagitoy.
Karaman ditoy da Sen. Manny Pacquiao, sigud a Vice President Leni Robredo, Philippine Olympic Committee President Abraham “Bambol” Tolentino, beauty doctor Vicki Belo, celebrity couple Ryan Agoncillo ken Judy Ann Santos-Agoncillo ken daduma pay.
Agserbi met kas matron of honor ken bridesmaid da actresses Angel Locsin ken Iza Calzado bayat a maysa ni Atom Araullo kadagiti agbalin kas groomsmen.
Kabayatanna, impaganetget ni LTC Ruelos a saan nga amin nga indibidual nga agtarigagay a mangipatungpal ti kallaysa da iti uneg ti akademya ket mapatgan.
Inlawlawagna nga adda ti prioridad dagitoy kas ti military officer a nakadesignar iti PMA, alumnus a saan a nakadesignar iti PMA ken sibilyan nga inyendorso ti alumnus no sadino ditoy ti kaibilangan ni Hidilyn Diaz malaksid pay nga isuna ket maysa a military reservist.
Sigun kenni LTC Ruelos, ti kallaysa da Diaz ken Naranjo ti maibilbilang kas high profile ita a tawen gaputa dagiti nagkallaysa kadagiti naglabas a tawen ket low profile.
Maipalagip nga idi Hulyo 26 idi napan a tawen ket napangabakan ni Diaz ti kaunaan a gold medal ti Pilipinas iti Tokyo Olympics nu sadino ti nasao nga aldaw ti nangiranaan da iti kallaysada.
Ti nasao nga okasyon ket saan a mailukat iti media gaputa tarigagay ti couple nga agbalin laeng a pribado ti espesyal nga aldaw dagitoy.