Maideploy dagiti kameng iti Baguio City Police Office kadagiti pedestrian lane, overpass, school zone, ken daduma pay a public convergence area kagiddan ti panagrugi ti School Year 2025-2026.
Iti panakiuman iti Bombo Radyo kenni Police Colonel Ruel Tagel, City Director iti Baguio City Police Office, ti deployment plan ket tapno maipanamnama ti kinatalged saan laeng a dagiti agiskwela nu di ket uray dagiti mannursuro ken dagiti parentes.
Malaksid iti dayta, kinuna ni PCol. Tagel a karaman metlaeng kadagiti pinagsaganaanda dagiti maipatungpal a regular school visit ken koordinasyon kadagiti school administrators para iti panakaaddress kadagiti safety concerns.
Iti agdama, dinakamatna nga adun a pagadalan iti agkidkiddaw iti tulong para iti panagsaganada iti pasukan kas kadagiti agpintor wenno agdalos – banag a patpatgan met ti kapulisan laketdi maikoordinar a nasayaat kadakuada.
Kagiddan dayta, imbinglay ti opisyal a ninamnamdan ti panakapasar iti nailet a gunay iti trapiko nu sadino, maysa kadagiti intervention nga ar-aramidenda ket ti panangipaay iti impormasyon a mangigiya kadagiti motorista.
Dinakamat ni PCol. Tagel ti regular a panangipablaakda iti real-time situations mainaig iti sasaaden iti trapiko kadagiti social media accounts dagitoy kas iti Facebook tapno maamwan dagiti motorista nu ituloyda pay ti agbiahe wenno itantanda.
Kinunana a maysa metlaeng kadagiti makatultulong iti panakaipaay ti impormasyon manipod iti opisina iti kapulisan ti panagaramat iti BCPO ViewBag Application.
Kabayatanna, nagpalagip daytoy a nu ituloy dagiti motorista ti agbiahe iti baet ti traffic congestion, masapol nga agbalon dagitoy iti atiddog a pasensya.//Bombo Rob Dominguez
