Umaw-awat iti pammadayaw dagiti kameng ti BFP Cordillera a da FO3 Samuel Angelo B. Fetero, FO3 Alphred Wayne Apolinar ken sumagmamano kadagiti kakaduada manipud iti BFP Region 1 ken Region 2 kalpasan nga inispalda ti maysa a Taiwanese a naulaw iti kalsada sadiay Taiwan.
Kalkalpas ti emergency medical training course dagitoy sadiay Taiwan idi June 29, 2026.
Agsagsagana dagitoy iti panagawidda iti pagilian idi nakitada ti maysa a tao a naawanan iti puot, partikular iti sideg ti nalatak a shopping district sadiay Taipei.
Sigun iti salaysay dagiti nangorganisar iti programa, immuna a sinukimat dagiti bombero ti aglawlaw no adda dagiti peggad ken inawaganda ti emergency services ti Taiwan.
Kalpasanna, inyakarda ti pasiente iti natalged a lugar ken sinukimatda ti puot, panaganges ken kasasaad ti biktima agingga a simmangpet dagiti emergency services.
Sigun kadagiti instruktor iti training program, ti inaramid dagiti Bombero a Pilipino ket repleksion ti disiplina nga impakitada iti nine-day course dagitoy.
Inladawanda pay dagiti Philippine trainees a kanayon nga atentibo iti classroom sessions ken hands-on scenario drills; kalmado ken balligi nga inyaplikarda ti casualty evacuation techniques ken patient assessment skills a naadalda bayat ti panagsanay dagitoy.
Ti TECC program ket maysa a train-the-trainer format no sadino, manamnama a maisuro dagiti techniques kadagiti Bombero ti pagilian a Pilipinas babaen kadagiti Philippine trainees a nakipaset iti nasao a programa sadiay Taiwan.
Panggep daytoy a patibkeren ti Taiwan-Philippines cooperation mainaig iti firefighting, disaster response, emergency medical care, ken capacity building.
Mapataud metlaeng ditoy dagiti kualipikado nga instruktor a mangpasayaat iti disaster-preparedness standards ti Taiwan ken Pilipinas.
