Agpalpalagip dagiti kameng ti Bureau of Fire Protection-La Trinidad kadagiti residente ti panagbalin a naannad ken naridam iti uneg ti pagtaengan ken ruar tapno maliklikan ti uram.
Daytoy ket kasaruno iti napasamak a grass fire itay kanikadua.
Iti pannakiuman ti Bombo Radyo kenni FO II Anthony Ubando, Fire Arson Investigator ti Bureau of Fire Protection-La Trinidad, napasamak ti uram iti pasado ala una ti malem idi Pebrero 5 idiay Bakun Village, Puguis, La Trinidad, Benguet.
Naideklara a fire under control ti uram iti 2:35 ken naideklara a fire out a 3 ti malem.
Impetteng ni Ubando nga awan ti estruktura a nairaman iti nasao nga uram ken daytoy ket manarimaan a maim-imbestigaran nu ania ti rason ti napasamak nga uram.
Inlawlawag met ti imbestigador a narigatan dagitoy a nangsebseb ti uram a dagos gaputa agap-apoy (re-ignite) daytoy.
Dumanon iti 3000 sqm ti nasao nga uram.
Agyamyaman met ti nasao nga opisial gapu iti pannakitinnulong ti BDRRMC-Puguis ken LTMPS.
Kabayatanna, daytoyten ti maikatlo a fire incident a nairekord ti munisipyu ti La Trinidad ita a tawen.
Iti rekord, dua ti napasamak nga structural fire, ken maysa met ti nairekord iti grass fire.
Mainaig iti daytoy, agpalpalagip dagiti maseknan nga ahensia iti publiko a saan a liwayan dagiti lutlutwen, aguliaen a sukimaten nga isara iti gasul kalpasan a maaramat, liklikan ti agpuor kadagiti basura, ikkaten dagiti nakasaksak nu saan a kasapulan ken dadduma pay a wagas tapno maliklikan ti uram.
