BAGUIO CITY – Sumangsango iti kaso a panaglabsing iti Comprehensive Dangerous Drugs Act of 2002 ti uppat nga indibidual, pakairamanan ti maysa a kameng ti maysa a drug group iti serye ti illegal drug buy-bust operations nga insayangkat dagiti operatiba ti PNP ken PDEA iti Baguio City ken Benguet idi kanikadua.
Nakemmeg ni Maria Bella Sopolmo, 41-anyos, hairstylist, kameng ti Pascua Drug Group nga addaan operasyon sadiay La Union ken residente ti San Nicolas West, Agoo, La Union iti operasyon sadiay Lourdes Proper, Baguio City.
Nakumpiskar kenni Sopolmo ti tallo a pakete ti mapapati a shabu.
Nakemmeg met ni Erwin Cuarteron, 21-anyos, bicycle attendant sadiay Burnham Park ken residente ti Aurora Hill, Baguio City iti operasyon iti maysa nga iskinita iti barangayda a nagresulta iti panakakumpiskar ti maysa a pakete ti mapapati a shabu.
Nakemmeg met ni John Nganayon Jr., 30-anyos, storekeeper iti operasyon sadiay Balili, La Trinidad, Benguet kalpasan a nakumpiskar kenkuana ti maysa a pakete ti mapapati a shabu.
Nakemmeg pay ni Randy Bugnay, 26-anyos, minero, tubo ti Lomon, Kapangan, Benguet ken residente ti Upper Abatan, Buguias, Benguet iti operasyon iti sitio dagitoy kalpasan a nakumpiskar kenkuana ti maysa a pakete ti mapapati a shabu.
