BAGUIO CITY – Mapadayawan dagiti uppat a pimmusay ken tallo a nadangran a kameng ti Kalinga Provincial Public Safety Company kalpasan ti napasamak nga engkwentroda kontra iti maysa a high value target sadiay Lubuagan, Kalinga itay laeng nabiit.
Sigun kenni Cordillera PNP regional director, PCSupt. Elmo Francis Sarona, maipaayan iti Medalya ng Kadakilaan wenno PNP Heroism Medal dagiti pimmusay a pulis bayat a maipaayan iti Medalya ng Sugatang Magiting wenno PNP Wounded Personnel Medal dagiti tallo a nadangran.
Maipaayan iti Medalya ng Kadakilaan da PO3 Cruzaldo Lawagan, PO2 Jovenal Aguinaldo, PO1 Charles Compas ken PO1 Vincent Paul Tay-od bayat a maipaayan iti Medalya ng Sugatang Magiting da PSI Edward Liclic, PO1 Ferdinand Assuncion ken PO1 Ferdie Liwag.
Inkarina met a malaksid iti maipaay a pammigbig kadagiti nasao a pulis ket maipaay pay kadagitoy dagiti amin a benepisyo a maiparbeng a maawatda kas iti finacial assistance manipud iti Public Safety Mutual Benefit Fund, special financial assitance ken ti presidential social fund nga agdepende iti posisyon dagitoy.
Iti panagturong dagiti opisial sadiay Kalinga ita nga aldaw ket ipaayda ti inisial a gatad bayat a manarimaan ti panakaiproseso dagiti dadduma a dokumento tapnu maipaay ti pakabuklan a tulong pinansial manipud iti gobierno.
Kabayatanna, impadanun met ni PCSupt. Sarona ti panakipagrikna ti sibubukel a PNP kadagiti pamilya dagiti pulis a nagsakripisyo para iti mandato ken serbisyo dagitoy iti publiko ken iti pagiilan.
