Makikokoordinaren ti Baguio City Police Office kadagiti nagduduma a babbarangay iti siudad ti Baguio tapno agdalus dagitoy iti masakupanda kas panagsagana iti umadanin a paniempo ti La Niña.
Iti panakiuman ti Bombo Radyo kenni Police Major Harriet Bulcio, rumbeng ti panagbalin a nakasagana dagiti babbarangay tapno maliklikan dagiti anyaman nga epekto ti didigra no sadino kasapulan ti panagdalus a nasapsapa kas paset dagiti preventive measures.
Iti biyang ti Baguio City Police Office, kinuna ni Bulcio a nakasaganan dagitoy iti manamnama a paniempo ti La Niña, addan a kompleto dagiti kagawaan dagiti pulis kas iti kapote, boats, ken dagiti radio communication dagitoy.
Addan met dagiti blue box wenno ti maaw-awagan kas search and rescue box a naglaon kadagiti ragadi, helmet, tali, chainsaw, falshlight ken daduma pay a mausar kadagiti anyaman a didigra.
Kabayatanna, kinuna ni Bulcio nga aktibo dagiti amin nga hotline numbers dagiti nagduduma nga stasyon ti pulis iti siudad ti Baguio a mang-akomodar kadagiti reklamo ti maseknan kasta met a mabalin nga umawag dagitoy iti #911 no kaspangaringan saanda ammo no anya a hotline ti kontakenda.//M
