Impakitan ti Armed Forces of the Philippines (AFP) iti publiko ti kampaniada a “Tatag Kapuluan” bayat ti selebrasion ti maika-89 nga anibersario ti pannakaipasdek daytoy idi laeng kalman.
Iti panagbitla ti hepe ti AFP a ni General Romeo Brawner Jr., indetalyena ti sirmata ken panggep ti kampania.
Impaganetget ti nasao nga opisial ti kinaandur ken kinatalged ti Pilipinas babaen ti panagregget dagitoy kadua ti nagduduma nga ahensia ti gobierno.
Sigun kenni Brawner, ipangpangruna ti Tatag Kapuluan ti panangpapigsa ti kabaelan ti militar a mangsalaknib kadagiti beddeng ti pagilian ken mangpasayaat iti disaster response operations.
Innayon ti hepe ti AFP a ti kampania ket mangipaganetget ti kinapateg ti panangtaming kadagiti pangta ti internal security.
Kabayatanna, tapno marisut dagiti karit iti geopolitikal ken aglawlaw, panggep ti AFP a papartaken dagiti panagreggetna iti modernisasion, a mangsigurado nga agtalinaed a makabael ken makaadaptar ti militar.
