BAGUIO CITY–Agtultuloy latta ti kampanya ti Population Commission (POPCOM)-Cordillera kontra iti nasaknap a teenage pregnancy ditoy rehion.
Iti interview ti Bombo Radyo kenni Population Commission Cordillera (POPCOM CAR) Regional Director Magdalena Abellera, kinunana a maob-obserbaran iti agdama ti ado nga agtutubo nga agsiksikog ken agpaspasngay.
Kagiddan iti dayta, manarimaan ita ti deliberasyon sadiay Kongreso seknan iti prebension dagiti agututubo ken iti suporta para iti social protection program para kadagiti maseknan.
Kinunana pay nga agtultuloy metlang ti Information Education Campaign dagitoy tapnu maipaayanda iti naan-anay a kapanunotan dagiti agtutubo seknan iti risgo ti panagsikog kabayatan ti nasapa nga edad dagitoy.
Dinakamatna a karaman iti puntiryada dagiti nagannak seknan iti napateg nga akemda iti panangisuro ken panangigiyada kadagiti annakda nangruna iti umno a panangdesisyoda maipapan iti relasyon ken sekswalidad.
