BAGUIO CITY – Saan a binaybay-an dagiti barangay officials ti Baguio ti mandatoda iti kampanya kontra iti iligal a droga iti baet ti agdama a pandemya.
Iti interview ti Bombo Radyo Baguio, kinuna ni Councilor Micheal Lawana, presidente ti Association of Barangay Captains ti Baguio nga adda dagiti barangay kadagiti distrito ti siudad a nagturpos ken nagleppas iti panagsanay para iti mandatoda iti nasao a kampanya.
Kinunana nga adda latta ti koordinasyon dagiti opisyales ken umili ti barangay kadagiti pulis ken iti PDEA mainaig kadagiti mapagat-atapan nga aktibidad iti lugarda.
Impannakkelna met nga iti napalabas a dua a tawen manipud naiyusuat ti Oplan Tokhang a paset ti drug war ket awanen dagiti barangay officials iti siudad a karaman iti iligal a droga.
Dinakamatna pay nga lima agingga sangapulo laengen a barangay iti Baguio ti mabambantayan iti iligal a droga.
Innayonna a manarimaan ti validation process kadagiti dadduma a barangay ti siudad para iti panakaideklara dagitoy a drug-cleared barangays.
