BAGUIO CITY – Ituloy ti baro a dadaulo ti Police Regional Office – Cordillera ti kampanya kontra iti iligal a droga ken dadduma a krimen ditoy rehion.
Inkari daytoy ni PCSupt. Rolando Nana iti panakiyuman ti Bombo Radyo kenkuana kabayatan ti panagsarungkarna iti Baguio City National High School idi agsapa.
Impettengna manen ti pammilin ni President Rodrigo Duterte para iti panakaparmek ti parikut iti iligal a droga ditoy pagilian babaen iti panakapunas wenno panakakissay dagiti pagmulaan ti marijuana a masarakan ditoy rehion.
Innayonna pay a malaksid iti kampanya kontra iti iligal a droga ket puntiryada pay ti panakaipababa ti kriminalidad iti rehion ken ti panangipasigurado a dagiti mangipatpatungpal kadagiti nagduduma a kampanya ti pulisya ket dagiti disiplinado a pulis.
