Mangiyuswat ti Cybercrime Investigation and Coordinating Center wenno CICC iti kampanya tapno mapapigsa ti digital safety dagiti ubbing, kasaruno dagiti insidente ti pammaltog kadagiti pagadalan.
Sigun kenni CICC Executive Director Aboy Paraiso, masurwan dagiti estudiante no kasano a mabigbig ken mai-report dagiti pangta iti online, pakairamanan ti posible a school shooting threats.
Maguyguyugoy metlaeng dagiti ubbing nga agridam kadagiti tattao a maam-ammoda iti online ken ti dagus a manangipakaammo kadagiti nagannak dagitoy iti kanito nga adda ti mapagduduaan a maipaar-aramid kadakuada.
Impagagetget ti CICC a napateg ti panagtitinnulong dagiti nagannak, mannursuro ken ti gobierno iti panangsalaknib kadagiti ubbing kontra iti online predators ken dadduma pay a digital threats.