Mapaingetanen ti kampanya ti lokal a gobyerno ti Baguio kontra iti sticker vandalism babaen iti Public Order and Safety Division (POSD).
Daytoy ket kas paset iti initiatiba ti nasao nga opisina tapno mapatalinaed ti kinadalos iti siudad.
Imbinglay ni POSD Chief Daryll Longid a mangisayangkat dagitoy iti cleaning operations kagidan iti panagbantay kadagiti aglabsing iti Anti-Graffiti Ordinance ti siudad kaduada ti Baguio City Police Office.
Nagpallagip met ni Longid iti publiko kadagiti pannusa a maipataw apaman a matiliw dagiti manglablabsing no sadino mabalinda a mapatawan iti
P5,000 wenno pannakaibalod iti agarup 30 nga aldaw kas nailanad iti ordinansa.
Inyunayunay ni Longid a nupay saan a makadadael ti sticker vandalism, pananglabsing latta daytoy iti ordinansa ti siudad no sadino maapektaran gamin ti pakabuklan a langa ken aglawlaw ti siudad.
Impettengna metlaeng nga adaptarenda ti zero-tolerance kadagiti matiliwanda a violators.
Kagidan dayta, ginuyugoy ni Longid ti publiko a makipasetda iti panangsalwad iti aglawlaw ti siudad ken nu adda dagiti makitada a makipaspaset iti sticker vandalism, dagosda nga ireport daytoy iti opisinada.
