BAGUIO CITY – Tutukan ti City Health Services Office ti kampanya kontra iti teenage pregnancy ita a tawen.
Sigun kenni City Health Officer Dr. Rowena Galpo, daytoy ket iti baet a bimmaba ti kaso ti teenage pregnancy ditoy lokalidad a dimmanon iti 904 manipud Enero agingga Setyembre ti 2017 no idilig iti nasurok 1,300 a datus iti kapada a panawen idi 2016.
Kinunana a nakatulong dagiti programada iti nasao a banag, partikular ti mismo a panagturongda kadagiti pagadalan tapnu agisuro kadagiti agtutubo.
Kagiddan iti daytoy ket kiniddawna ti tulong dagiti nagannak iti panakabantay a naimbag dagiti annakda ken iti panakailawlawag ti nasapa a panagsikog iti panagadal dagiti agtutubo.
Inaklonna met a kasapulanda ti kanayonan a tawen tapnu maamuan no epektibo ti kampanyada kontra iti teenage pregnancy gaputa idi laeng napalabas a tawen a nailistada ti panagbaba ti kaso ti teenage pregnancy ditoy lokalidad.
Naamuan a ti nailistada a kaubingan a nagpasngay ket agtawen laeng iti sangapulo (10) ken manipud iti 904 a datusda idi napalabas a tawen ket 259 ti residente iti siudad ti Baguio.
