BAGUIO CITY – Mapagsarsaritaan ita ti kampanya kontra iti vote-buying.
Sigun iti Omnibus Election Code, saan laeng a ti panaglako iti botos babaen iti kuarta wenno material a banag ti ramanen ti vote-buying.
Karaman pay ditoy ti panangikari dagiti kandidato iti proyekto ken pabor kadagiti botante.
Malaksid iti daytoy, saan laeng a dagiti aglaklako iti butos ti mabalin a madusa iti vote-buying, no di ket uray dagiti gumatgatang iti daytoy.
Nupay kasta, agparang nga awan pay ti nadusdusa a nanglabsing iti nasao a linteg gapu iti kinaawan dagiti agtestigo.
Makapaladingit ta agparparang met a normal kadagiti dudduma ti vote-buying.
Gapu iti daytoy, rumbeng a mabaliwan ken mapadagsen ti linteg seknan iti vote-buying.
Rumbeng met a maingiten ti Information Education Campaign iti daytoy tapno maipakaawat iti publiko ti pagdaksan ti nasao nga aramid.
Sapay kuma ta malawlawagan dagiti botante a dakdakkel ti mapukaw iti masakbayanda no makiramanda iti vote-buying.
