BAGUIO CITY – Ingetan ita ti Philippine Army ti kampanyada a panangguyugoy iti panagsuko dagiti kameng ti New People’s Army (NPA), ti armado a sanga ti Communist Party of the Philippines (CPP).
Sigun kenni Col. Leopoldo Imbang Jr., commander ti 503rd Brigade ti 5th Infantry Star Division ti Philippine Army, no idilig iti dadduma a rehion ket bassit laeng ti bilang dagiti sumuksuko a kameng ti NPA ditoy Cordillera.
Kinunana nga adu dagiti programa ti gobyerno para kadagiti sumuko a kameng ti NPA ngem masaysayang laeng dagitoy gaputa manmano met dagiti NPA a kayatna ti sumuko.
Dinakamatna nga adda dagiti NPA a kayatda ti sumuko ngem malaplapdan dagitoy gapu iti propaganda ti CPP founder a no sumuko dagiti miembro ti NPA ket dangdangran dagitoy ti tropa ti gobyerno.
Impetteng ni Imbang nga awan ti rumbeng a pagbutngan dagiti NPA a kayatna ti sumuko gaputa saanda a dangran dagitoy ken iti kinapudno ket ipaayanda pay iti seguridad dagitoy manipud kadagiti sigud a kakadua dagitoy.
Dinakamatna a saan laeng nga iti militar a mabalin a sumuko dagiti NPA ngem ketdi, mabalin met kadagiti pulis wenno kadagiti local officials.
Iyap-apelana pay ti panangibati dagiti NPA iti terrorist activities dagitoy para iti napimpintas ken nataltalna a panagbiag, kaduada ti komunidad ken ti pamilya dagitoy.
