BENGUET PROVINCE – Dumanonen iti lima a disqualification case ti naipila kontra kenni Benguet Congressman-elect Eric Go Yap.
Daytoy ket kalpasan a naawat ti kampo ni Yap ti baro manen a kopya ti kaso ita nga aldaw.
Impila daytoy dagiti walo a petitioners a da Zacarias Juan Depolio manipud Tomay, La Trinidad; Loreto Buya-an manipud Cada, Balili, Mankayan; Dalmacio Sissi-it manipud Pasna-an, Balili, Mankayan; Eusebio Fernandez manipud Poblacion, Bakun; Pedro Wayan Cosente manipud Gambang, Bakun; Jovito Palayen manipud Tawang, La Trinidad; Freddie Punasen manipud Tuding, Itogon; Mariano Tininggal manipud Poblacion, Buyagan, La Trinidad ken Victor Belino manipud Baculongan, Buguias.
Sigun kadagiti petitioner, saan a natural-born citizen of the Philippines ni Congressman Yap.
Maipalagip nga idi kalman ket naawat metlaeng ni Yap ti kopya ti maikappat a disqualification case kontra kenkuana babaen iti petitioner a ni Leopoldo Dizon Lamsis manipud Daclan, Bokod, Benguet.
Sigun iti petisyon, nilabsing ni Yap ti COMELEC Resolution 11111, Sec. 5 wenno ti saan nga umno a panangipaskil iti campaign materials kadagiti common posting areas.
Nakalanad pay iti petisyon Lamsis a nilabsing ni Yap ti COMELEC Resolution 11086, Sec. 8 in relation to Fair Election Act, R.A. 9006, Sec.13.
Immuna metten a nangipila iti disqualification case kontra kenni Congressman-elect Yap da Melton Ladiocan, residente ti Amgaleyguey, Buguias ken Mario Ludaes manipud Mankayan ti dua a disqualification case kontra kenni Yap gapu iti mapapati a vote buying ken isyu iti citizenship.
Sakbay dagitoy a kaso, maysa a disqualification case kontra kenni Yap ti naipila idi pay napan a tawen rason a nasuspendir ti pannakaiproklamana kas nangabak a kongresista ti Benguet idi Mayo 13, 2025.
Gapu kadagitoy a kaso, impablaak ni Yap iti social media page daytoy a desididon nga agipila iti kaso kontra kadagiti petitioners ken kadagiti dadduma a tao nga adda iti likudan dagiti disqualification cases kontra kenkuana.
Sigun iti kongresista, sangoenna amin dagiti nasao a kaso gapu ta kayatna nga agserbi iti probinsiya.
