BAGUIO CITY- Awan pay ti pormal nga affidavit of complaint a naawat ni sigud a Bureau of Corrections security officer Col. Ricardo Zulueta, ti maysa kadagiti maitudtudo a mastermind iti ipupusay daydi radio broadcaster Percy Lapid isut gapuna a saan a nangipila ti kampona iti counter affidavit.
Iti interview ti Bombo Radyo Baguio, kinuna ni Atty. Lauro Gacayan, Legal Counsel ni Col. Ricardo Zulueta, ti laeng subpoena ti naawat ni Zulueta.
Impettengna nga iti kanito a makaawat ni Zulueta iti affidavit of complaint ket mangipilada iti motion for inhibition a pakailanadan dagiti argumento, desisyon ti korte suprema a mangsuporta iti immediate inhibition iti Department of Justice tapno maipanamnama ti patas nga imbestigasyon iti kaso.
Sigun pay kenni Atty. Gacayan, madama pay laeng ti diskusyon iti pannel of prosecutors iti kaso a murder a naipila kontra kenni Zulueta.
Inlawlawagna a mangipilada iti counter-affidavit iti opisina ti Ombudsman no mapatgan ti mosyon da ngem no saan ket iyapelada daytoy iti pannel of prosecutors sakbay iti Department of Justice.//BomboNewsTeam
