Nagkedked ti staff ti abogado ken sigud a pannakangiwat ti presidente a ni Harry Roque nga umawat iti arrest warrant nga inserbi dagiti otoridad kontra kenkuana ita nga aldaw.
Daytoy ket sigun kenni House Secretary General Reginald Velasco.
Kinuna ni Velasco babaen iti report dagiti House sergeant at arms a saan nga inawat dagiti staff ti law office ni Roque ti arrest order a naiserbi iti agarup alas 9 ita nga aldaw ti Biernes.
Nupay kasta, nagtalinaed latta dagiti kameng ti National Capital Region Police Office iti law office ni Roque tapno maiserbi ti arrest order.
Ti contempt citation ni Roque ket addaan iti detention order iti House of Representatives agingga a mapasardeng ti “inquiry” wenno panagdamag ti chamber kadagiti krimen a mainaig iti POGO.
Kabayatanna, ni Atty. Harry Roque a pannakangiwat ti termino ni sigud a President Rodrigo Duterte ket pinaglibakanna ti akemna iti iligal nga operasion ti POGO.
Nupay kasta, inaklonna a nangipaay daytoy ti legal a pammagbaga iti Whirlwind Corporation, ti agtagikua iti daga a nakaisaadan ti na-raid a POGO hub sadiay Porac, Pampanga, maysa nga insidente nu sadinno, naiparang dagiti nagduduma a kriminal nga aktibidad kas iti “torture” ken “scam hubs.”
