Isingsingasing ni Baguio City Councilor Betty Lourdes Tabanda ti kanayonan a financial gift para kadagiti centenarians iti siudad ti Baguio.
Sigun kenni Councilor Tabanda, P100,000 ti nasayaat a maipaay a financial gift kadagiti centenarians iti Baguio City, manipud iti agdama a P20,000 a maawat dagitoy.
Impeksana a kas maysa a siudad ti Baguio, masapul a mapadakkel ti maited a benepisio kadagiti senior citizen a makadanon iti edad a 100 a tawen, kas pammaneknek iti panangbigbig ken panangipateg ti siudad kadagiti kontribusion dagitoy iti komunidad.
Maibasar iti datos, iti las-ud ti maysa a tawen, adda iti agarup 12 agingga 15 a centenarians iti siudad ti Baguio.
Panggep daytoy a singasing a mangipaay iti ad-adu a tulong pinansial kadagiti centenarians tapno makatulong iti kasapulan dagitoy, nangruna iti panangtaripato iti salun-at ken dagiti dadduma pay a gastos iti inaldaw.
Sigun kenni Councilor Tabanda, masapul a maipangruna ti pagimbagan dagiti nataengan babaen iti nasayaat a programa ken benepisio a mangipakita iti panangbigbig ti gobierno lokal iti adal ken serbisyo dagitoy iti komunidad.
Nupay kasta, ti panagbalin a P100,000 ti financial gift ket agtalinaed pay a singasing a masapul a maadal ken maurnos sakbay a maipatungpal.//Bombo Khey Reparip
