BAGUIO CITY – Impanamnama ni ACT-CIS Party-list ken Benguet Caretaker Eric Go Yap ti panakaipaay ti kanayunan a health benefits ken dadduma pay a development projects kadagiti amin a munisipyo ti probinsia ita a tawen wenno iti sumaruno a tawen.
Kinunana a puntiryana a tulungan dagiti amin nga umili ti probinsia babaen iti panagkiddawna ti tulong pinansyal manipud iti nasyonal a gobierno ken kadagiti nagduduma nga ahensya tapnu maituloy dagiti programa a maipapaay kadagiti umili.
Sigun kenkuana, maysa kadagiti panggepna ti panakaipataming dagiti amin nga umili nga addaan sagubanit inton sumaruno a tawen.
Inyunay-unayna nga adu pay ti panggepna tapnu mapadur-as ti probinsya ken tapnu amin nga umili ti Benguet ket matulungan ti gobierno.
Impannakel pay ni Yap ti panagbisita dagiti kandidata ti Miss Universe Philippines 2020 sadiay Benguet a nakaital-o-an ti turismo ken kinabaknang ti probinsiya.
Maipalagip nga itay laeng nabiit ket nangidonar daytoy ti drones kadagiti 13 a municipal police stations ti Benguet kas panangsuportarna iti panakapapintas pay ti serbisyo dagiti pulis iti probinsia.
