BAGUIO CITY – Nangipaay manen ti National Housing Authority (NHA) iti kanayonan a P10-M iti ili ti Itogon, Benguet.
Sigun kenni NHA General Manager Marcelino Escalada Jr., maaramat ti nasao a gatad iti panakagatang ti lote nga agserbi a resettlement site para kadagiti pamilya a biktima ti Bagyong Ompong ken dagiti agnanaed kadagiti naideklara a ‘no build zone’ sadiay Itogon.
Kinunana nga indanunna kenni Senate Committee on Housing chairman Senator JV Ejercito ti kiddaw ni Itogon Mayor Victorio Palangdan a no mabalin ket panggatang laengen iti lote para iti resettlement site ti immuna a P10-M nga impaay ti NHA sadiay Itogon.
Maipalagip a nangipaay ti ahensia iti P10-M para iti panakagatang dagiti housing materials nga aramaten dagiti benificiaries a mangipasdek iti baro a babbalay dagitoy.
Nupay kasta, kinunana a napagnumuanda laengen a mangipaayda iti kanayonan a P10-M ken daytoy ket iti pammalubos ni Presidente Rodrigo Duterte.
Sinaksian a mismo da Senator Ejercito ken Senator Sherwin Gatchalian ti turn-over ti cheke a naglaon iti nasao a gatad.
Kabayatanna, nangipaay ti lokal a gobyerno ti San Juan City, Metro Manila nga idadauluan ni Mayor Guia Gomez iti P1-M para kadagiti umili ti Itogon.
Naamuan a ti Itogon ken ti San Juan City ket sister-LGUs.
Nangipaay met ni Senator Gatchalian iti P2.5-M para kadagiti pamilya iti Cordillera nga inapektaran ti bagyo ken P500,000 para kadagiti apektado nga umili ti Itogon.
