BAGUIO CITY – Mairekreklamo ti kanayonan a P5 iti plete dagiti para-pasahero a jeep iti sumagmamano a lugar ditoy Baguio City.
Imbutaktak daytoy ni Federation of Jeepney Operators and Drivers Association for Baguio City, Benguet and La Union (FEDJODABLU) president Pat Evangelista iti panakiyuman ti Bombo Radyo.
Sigun kenkuana, makaaw-awatda ti reklamo manipud kadagiti pasahero iti nagduduma a paset ti Baguio City mainaig iti panakanayon ti plete dagitoy.
Kinunana a karaman kadagiti mairekreklamo gapu iti kanayonan a P5 iti plete dagiti para-pasahero a jeep nga agbibiahe iti Quirino Hill, Irisan ken Marcos Highway.
Immuna iti daytoy, naireklamo iti Bombo Radyo ti kanayonan a P5 a bayad dagiti jeep iti Asin Hot Spring.
Inlawlawag met ni Councilor Benny Bomogao a posible laeng ti panakaipangato ti plete kadagiti para-pasahero a jeep no adda ti maaprobaran a petisyon iti Land Transportation Franchising and Regulatory Board (LTFRB) para iti fare hike.
Sigun kenkuana, saan a mapalubusan dagiti private groups wenno jeepney associations nga agdesisyon iti daytoy nga awan ti pammalubos manipod iti nasao nga ahensya.
Balballaaganna met dagiti dagiti nangipangato ti plete gaputa posible a makanselar ti prangkisa dagitoy.
