BAGUIO CITY- Naipaulog ti Executive Order No.46, series of 2021 a nakailanadan dagiti kanayonan a paglintegan iti panaggaraw dagiti tattao ken kadagiti aktibidad ditoy siudad ti Baguio nga agleppas inton Dominggo, April 4.
Maitunos daytoy iti panagtungpal ti siudad iti Resolution No. 106 ti National IATF a nangibilin iti dagus a panangimplementar ti Cordillera Region iti nairtengan pay a Prevent, Detect, Isolate, Treat and Reintegrate measures tapnu malimitaran ti garaw ti tattao, mapapartak ti contact tracing ken matulongan ti epektibo nga isolation ken quarantine dagiti nakaptan ti COVID-19.
Linaon ti baro a pammilin ni Mayor Benjamin Magalong ti panakabaliw ti curfew hours nga agbalin to nga alas-dies ti rabii agingga alas kwatro ti parbangon.
Gapu iti daytoy, agbalin metten nga alas-siete ti rabii agingga alas-nuebe kwarenta’y singko ti rabii ti operasion ti night market.
Maisubli met ti stay-at-home restriction kadagiti agtawen ti sangapulo ket lima nga agpababa, pakairamanan dagiti masakit, masikog ken agtawen ti innem a pulo ket lima nga agpangato.
Agbalin pay a 50% maximum capacity dagiti physical fitness activities, pakairamanan dagiti sports and recreation centers.
Nailanad met laeng iti kaudian a pammilin ni Mayor Magalong ti panagsurot dagiti dumaldalan kadagiti checkpoints ti siudad iti panagsuot iti face mask ken face shields ken iti panangisigurado dagiti drivers dagiti parapasahero a lugan a kanayon ti panakasurot dagiti health protocols iti uneg ti imanmanehoda a lugan.