Kidkiddawen ita ni Senator Francis “Kiko” Pangilinan ti kanayunan a subsidy para kadagiti mannalon ken mangngalap iti tenga ti panangngato ti presyo ti petrolyo iti world market gapu iti bumarbara a tensyon idiay Middle East.
Sigun kenni Senator Pangilinan, kasapulan a manayunan iti tulong ti gobyerno iti sektor ti agrikultura kagiddan iti panangsuspindir ti excise tax kadagiti produkto a petrolyo.
Kabayatanna, inyebkas dagiti mangalap ti pannakadismayada iti P3000 cash assistance a magapo iti P75 milyon manipud Bureau of Fisheries and Aquatic Resource (BFAR).
Sigun kadakuada, saan nga umdas ken nababa unay ti nasao a gatad ken saan a maitunos iti mannarimaan a sitwasyon.
Impetteng ni Senador Pangilinan nga uray ni doblien ti gatad, saan latta nga umdas no saan a mapababa ti presyo ti petrolyo.
Dinakamat daytoy a mabalin a maala ti kanayunan a subsidy manipud iti P10 Billion Presidential Assistance to Farmers and Fisherfolks idiay General Appropriations Acts of 2026. //Bombo Karen Sapirao
