Agbalbalin a maysa kadagiti makitkita a karit iti nabuntog a panakaireport dagiti kaso ti cybercrime ti kinakurang ti opisina a mabalin a pagkamangan dagiti biktima kadagiti sumagmamano a paset ti rehion Cordillera.
Iti panakiuman ti Bombo Radyo PCol Maria Theresa Pucay, dadaulo ti Philippine National Police-Regional Anti-Cybercrime Unit- Cordillera, saanen nga agrepreport dagiti sumagmamano a mabikbiktima iti cybercrime gapu ta napaut nga oras ti mabusbos dagitoy nangruna ta adayo dagiti opisina a mabalinda a pagkamangan wenno pagreportan.
Mainaig iti dayta, dinakamat ni Pucay a manamnama ti panakaipasdek ti kanayonan nga opisina ti cybercrime unit iti rehion partikular kadagiti probinsya ti Abra ken Apayao nga iti agdama ket awanan pay ti cyber reponse team.
Nupay kasta, impeksa ti nasao nga opisyal a maysa metlaeng kadagiti rason iti kinaawan paylaeng dagiti cybercrime office ti kinakurang metlaeng ti personel a mangbukel iti anti-cybercrime group.//Bombo Rob Dominguez
