Imbutaktak ni House Deputy Majority Leader Francisco Paolo Ortega V ti nagan dagiti pito pay a maipagarup nga umawat iti confidential funds manipod iti Office of Vice President Sara Duterte, pakairamanan ti maysa a “Jay Kamote” ken maysa a “Miggy Mango.”
Iti panagilawlawag ti kongresista, kinunana a dagiti nabati a baro a nagan ket Dodong Alcala, Dodong Bina, Dodong Bunal, Dodong Darong, ken Dodong S. Barok.
Sigun kenni Ortega, mabalin a maaramatda daytoy tapno mapapigsa ti impeachment case kontra kenni Vice President Duterte.
Maipalagip a nangisubmitir ti Department of Education nga idadauloan idi ni Duterte, ken Office of the Vice President kadagiti dokumento a mapapati nga addaan iti saan a pudno a petsa, “signatures” nga awanan ti nagan dagiti signatories, ken saan a mabasa a nagan dagiti signatories tapno mai-justify dagiti disbursement ti confidential funds daytoy idi tawen 2022 ken 2023.
Karaman kadagiti signatories ket ti agnagan ti “Mary Grace Piattos,” nga awanan ti rekord iti Philippine Statistics Authority.
Itay laeng nabiit, tallo a kanayunan pay a nagan ti maipagarup a beneficiaries ti naibutaktak pakairamanan ti agnagan ti “Xiaome Ocho.”
