Sinuratanen ti Commission on Elections-Baguio ti kandidato iti kinasenador nga addaan iti dakkel a poster sadiay Lower Session Road, Baguio City.
Iti panakiuman ti Bombo Radyo kenni Atty. John Paul Martin, Election Officer iti Commission on Elections, kinunana a ti poster ti nasao a senador ket masapol nga agtulnog iti naipaiyulog a pagalagadan kas iti umno a rukod a 2×3 feet gapu ta oversized daytoy.
Nupay kasta, agbalbalin a karit iti Commission on Elections ti maipapan iti baro a pagalagadan nga inpaiyulog iti Korte Suprema nu sadino, off limits dagitoy wenno saanda a mabalin a pakialaman dagiti posters a naimuntar wenno naidisplay kadagiti private entities.
Sigun kenni Atty. Martin, no ti maysa a poster ket ginastosan ken impatakder dagiti private entities ket saanda a mabalin a pakibiyangan dagitoy.
Dagiti laeng mabalin a babalawen ti Commission on Elections-Baguio ket dagiti mismo nga inmuntar dagiti kandidato iti umadanin nga eleksyon.
Gapu iti dayta, mabalin a maliklikan dagiti kandidato dagiti poster dagitoy nga aglabsing iti paglintegan.
Kabayatanna, imbinglay ni Atty. Martin nga adda ti maysa pay a party-list nga addaan met laeng iti dakkel a poster iti paset ti Legarda Road, Baguio City.//Bombo Mera Pacpacan
