BACNOTAN, LA UNION – Nairekord ti probinsiya ti La Union ti 46 agingga 47 degree celcius, kangatoan a heat index iti Region 1 ita a lawas.
Maibasar iti report ti Philippine Atmospheric, Geophysical, and Astronomical Services Administration (PAGASA), posible a ngumato pay iti “danger” category ti heat index idiay Bacnotan, La Union ita nga aldaw ken inton bigat.
Nailista ti munisipyo ti Bacnotan ti 42, 46 ken 47 degrees celcius ita a lawas.
Sigun iti PAGASA, ti 42 agingga 51 degrees celcius ket maibilangan iti “danger” category.
Malaksid iti La Union, awan met ti dadduma lugar iti pagilian a nairaman iti “danger” category ngem agtultuloy latta ti monitoring dagitoy.
Kabayatanna, nagballaag met dagiti health professionals iti publiko nga aginum ti ado a danum tapno maliklikan ti heat cramps, exhaustion ken heatstroke.
