BAGUIO CITY – Nailista ti 516 a kaso ti COVID-19 iti siudad ti Baguio idi laeng kalman, January 13, 2022.
Maibasar iti rekord, daytoy ti kangatuan a kaso ti COVID-19 a nailista ti siudad iti uneg laeng ti maysa nga aldaw ken inartapanna ti sigud a rekord a 411 a kaso iti maysa nga aldaw a nailista idi September 18, 2021 kagiddan ti panagwaras ti Delta variant.
Iti interview ti Bombo Radyo Baguio kenni City Administrator Engr. Bonifacio Dela Peña, pinattapattan dagiti opisyal ti siudad a dumanon iti 500 a kaso ti innaldaw a mailista ti siudad kagiddan ti baro a panagngato dagiti kaso ti COVID-19 a mapapati nga ituntunda ti Omicron variant.
Kinunana a pimmudno ti nasao a pattapatta iti benneg ti innaldaw a kaso ti COVID-19.
Innayonna a pattapattaenda pay a dumanon iti 6,000 agingga 9,000 ti agbalin a pakabuklan a kaso ti COVID-19 iti innaldaw sakbay a marikna ti panagbaba dagiti kaso ti nasao a sakit.
Impettengna met nga idi pay Nobyembre ket addan ti inaramidda a contingency plan kontra iti Omicron variant ken nakasagana metten dagiti resources ti siudad kas kadagiti agas.
Innaklonna pay a no maartapan ti pattapatta dagitoy nga agbalin a kaso iti siudad gapu iti baro a variant ti coronavirus ket agkurang to dagiti ospital ken dagiti pasilidad para kadagiti makaptan iti nasao a sakit.
Nupay kasta, imbinglayna nga adda ti Plan B ken daytoy ket ti panakaipalubos ti home isolation dagiti pasyente a maklasipikar a mild case iti COVID-19 la ketdi makwalipikar dagiti pagtaengan dagitoy a mabalin a maaramat iti panag-quarantine.
Kabayatana, ailukaten dagiti hotels ken dormitoryo nga agserserbi nga isolation facilities iti siudad ti Baguio kagiddan ti panagngato ti kaso ti COVID-19.
Dinakamat ni City Administrator Engr. Bonifacio Dela Peña a dagitoy dagiti pasilidad a supsuportaran ti Office of Civil Defense – Cordillera.
Innayonna nga iti kaudian a report idi Martes ket 43-47% ti occupancy rate ti Baguio City Community Isolation Unit sadiay Santo Niño Hospital ken ti Teacher’s Camp.
Pinagyamananna met nga awan unay dagiti nakakaro a kaso ti COVID-19 kadagiti aktibo a kaso ti siudad iti nasao a sakit.
Maibasar iti rekord ti Department of Health – Cordillera, ti Hospital Care Utilization Rate ti Baguio City idi kalman ket dimmanon iti 89.62%.
Nakasagana met ti Baguio no bilang maipasidong ti siudad iti Alert Level 4 kagiddan ti panagngato ti kaso ti COVID-19 iti lokalidad.
Sigun kenni City Administrator Engr. Bonifacio Dela Peña, daytoy ket gaputa kanayon a dynamic ti contingency plan ti siudad.
Inlawlawagna a kagiddan ti itataud dagiti pagkasapulan nga ituntunda ti pandemya ket mabalbaliwan ken mapaspasayaat ti plano para iti epektibo a panagresponde kontra iti pandemya.
Innayonna a manaynayonan metlaeng dagiti resources a maar-aramat iti panagresponde iti pandemya,
Nupay kasta, inyunay-unayna nga ita ket awan paylaeng ti pagkasapulan para iti nasao nga addang.
