Impasidong ti Philippine Institute of Volcanology and Seismology (Phivolcs) ti Kanlaon Volcano iti Alert Level 2 kasaruno ti napigsa a panagbettak daytoy itay laeng sardam.
Sigun kadagiti seismologists, immuna a naobserbaran ti medyo napigpigsa a volcano-tectonic earthquake.
Ti panagbettak ti nasao a bulkan ket bimmayag iti innem a minutos ken nakapataud ti napuskol ken incandescent nga asok a dimmanun iti lima ribo a metro a kangato manipod iti vent daytoy, kasta met a nakairuar ti maatap a pyroclastic density currents dua agingga tallo a kilometro iti southern ken southeastern slopes daytoy.
Mainaig iti dayta, nakaawat met ti report dagiti otoridad a mapaspasaran ti ashfall kadagiti komunidad nga asideg iti southwestern slopes ti nasao a bulkan ken makaang-angot dagiti residente sadiay ti sulfurous odors.
Kabayatanna, makidkiddaw met ti panagridam dagiti residente nga asideg iti daytoy tapno maliklikan ti panakadangranda iti posible a panagtennag dagiti bato ken panagreggaay ti daga kasta metten iti posible a panagbettak manen daytoy.
Nabilin metten dagiti maseknan nga indibidwal iti civil aviation a pakaammoanda dagiti piloto a liklikanda paylaeng ti dumalan iti paset ti tangatang nga asideg iti wangawangan ti nasao a bulkan.
