BAGUIO CITY – Impeksa ti maysa nga ina ti sakit ti nakem daytoy iti maysa nga ospital sadiay Pangasinan gapu iti saan a napintas a panangtratoda iti anakna nga intarayna iti nasao a pagagasan para iti premature a panagpasngay daytoy.
Segun iti nasao nga ina a nagkedked nga agpadakamat iti nagan, residente dagitoy iti siudad ti Baguio ngem nagturongda sadiay Pangasinan tapnu agbakasyon.
Kinunana a saanda a ninamnama ti premature a panagpasngay ti anakna isut gapuna nga intarayna iti ospital nangruna ta kasapulan a maikabil iti incubator ti maladaga.
Nupay kasta, kinuna ti nasao nga ina a saanda dagitoy nga inas-asikaso gaputa awan ti maitedda a downpayment a P5000.
Dinakamatna a kinuna dagiti adda iti ospital a kasapulan a bayadanda ti nasao a gatad gaputa dagiti kagawaan ti ospital ket tagikua ti maysa a pribado a negosyante nga ab-abangan laeng dagitoy.
Innayunna a malaksid iti nasao a gatad ket adda pay ti inkalikagum ti ospital a P1500 a bayadanda iti innaldaw ken nu maliwayanda a bayadan daytoy ket imballaag dagiti adda iti ospital nga ikkatenda ti tubo a mangsupsuportar iti panaganges ti maladaga.
Iti agdama ket adda pay laeng iti ospital sadiay Pangasinan ti maladaga gaputa saanda a basta-basta maiyakar ditoy siudad gaputa naka-incubator daytoy.
Innayunna a saanda pay a nangipatungpal iti legal nga addang gaputa awan pay ti pananggastos dagitoy.
