BAGUIO CITY – Imbinglay ti maysa a traffic auxiliary personnel iti siudad ti Baguio ti kaudian a kapadasanna a naalaan iti ladawan ken video ti maysa a netizen a nagbalin a viral iti social media.
Iti panakiuman ti Bombo Radyo kenni Bernard Gill Alvaro, kinunana a bayat ti rush hour deployment dagitoy idi Martes ket imanmandona ti trapiko iti intersection ti General Luna idi adda ti maysa a jeep nga addaan ruta a Baguio Plaza-Trancoville ti saan a nagtungpal iti pammilinna.
Kinunana a pinullatan ti nasao a jeep ti pagnaan dagiti dadduma a lugan isut gapuna a sinitarna ti driver ngem nagkatawa laeng daytoy ken inrason daytoy ti mapaspasaran a nailet a gunay ti trapiko.
Gapu iti dayta, kiniddaw ni Alvaro ti lisensya ti nasao a driver ngem nagkedked daytoy ken idi rinugianna a baklasen ti plaka ti jeep ket killaat nga inyatras ti driver ti lugan.
Impetteng ti driver kenni Alvaro nga awan ti linabsingna a linteg-trapiko ngem saan daytoy a sinardengan ti traffic auxiliary personnel ken napan iti sango ti jeep ngem inyatras manen ti driver ti lugan ken inturongna iti pababa a kalsada.
Simmabit met ni Alvaro iti sangwanan ti nasao a jeep tapnu saan daytoy a masagid ken sadiay a pinasardengna ti nasao a driver ken babaen iti tulong ti maysa a pribado a lugan a nangserra iti pagdalanan ti nasao a jeep ket balligi a naalana ti plaka ti nasao a jeep.
Naamuan a nagturong iti Traffic Management Unit ti agtagikua iti nasao a jeep ken nagkiddaw ti dispensar ngem saan latta nga aklonen ti nasao a driver ti biddut daytoy.
Inyapelana ti panagsurot dagiti drivers iti linteg-trapiko ditoy siudad para iti naannayas ken natalged a panagbiahe dagitoy.
Kinunana a para iti pagsayaatan ti amin dagiti maipatpatungpal a linteg-trapiko isut gapuna a saan a rumbeng a tuladen dagiti dadduma a motorista dagiti makitkitada a panaglabsing dagiti padada a motorista.
Kinunana a pito a tawennan iti kalsada a mangimanmando iti trapiko ken maibagana nga adu paylaeng dagiti pasaway a drivers isut gapuna a kanayon dagitoy a matiltiliw.
Innayonna a nakasagana met daytoy a mangsango no adda ti reklamo dagiti drivers iti saan nga umno a panagtiliwna kadagitoy ken mabalin laeng nga agturong iti Traffic Management Unit ti dagiti maseknan tapnu agreklamo.
