Kidkiddawen ita ti kapamilya ti pimmusay a lalaki nga agtawen iti 52, maysa a butcher, ken residente iti San Carlos Heights, Irisan, Baguio City iti hustisya gapu iti ipupusay ti ama dagitoy kalpasan a nabangga daytoy iti lugan.
Agkidkiddaw metlaeng dagitoy iti suporta ken agtultuloy a pannakainayun ti nasao a pamilya kadagiti karkararag.
Sigun iti social media post ti anak ti pimmusay a biktima, inyebkasna ti namnamana a maduktalan ti kinapudno ket sumungbat ti tao a responsable iti napasamak iti ama dagitoy.
Kabayatanna, iti ekslusibo a pannakiuman ti Bombo Newsteam kenni Pcpt. Johnsen Sauro Unay, Acting Station Commander ti Baguio City Police Office Station 9, pasado alas dos ti parbangon idi Agosto 6 iti nakaawat dagitoy iti awag a mangipakpakaamo nga ada ti napasamak nga insidente idiay San Carlos Heights, Irisan, Baguio City.
Apaman a nadanonda ti nakapasamakan ti insidente, nadanunanda ti suspek wenno drayber ti lugan. Ti nasao a suspek, agtawen iti 22, estudyante, ken residente iti isu metlaeng a lugar.
Iti inisyal nga imbestigasyon dagitoy, pasado ala-una a napasamak ti insidente no sadino nagtaod San Carlos Heights ti driver paturong iti national highway idi nabanggana ti biktima a magmagna iti kalsada.
Sigun met iti pablaak ti biktima, apan kuman aguray iti taxi ti ama dagitoy tapno mapan agtrabaho idi napasamak ti insidente.
Gapu iti pannakadungpar daytoy, nagsagrap ti biktima iti fatal injuries iti ulo na rason tapno naideklara daytoy a dead on arrival.
Kabayatanna, innayon ni Pcpt Unay a cooperative met ti driver ken innaklonna a daytoy ti nakadungpar iti biktima.
Naiturong metlaeng ti nasao a drayber iti ospital para iti AB test no sadino nagpositibo daytoy.
Impeksa met ti opisyal a naiturnover metten ti kaso a reckless imprudence resulting in Homicide iti Traffic Enforcement Unit ti Baguio City Police Office nga isu metten ti mangisagana iti kaskenan a dokumento para iti pannakaipila ti kaso kontra iti suspek.
Iti sabali a bangir, kinuna ni Pcpt. Unay a manipud Enero agingga iti Agosto 14, dua pulo ket uppat metten a kaso ti Vehicular Traffic Incident ti nairekord dagitoy.
Manipud iti nasao a bilang, 13 ti napasamak iti Barangay Irisan, 11 idiay Barangay Asin no sadinno kadawyan nga karaman kadagiti aksidente ket dagiti motor.
Impeksa met ni Pcpt. Unay a maysa laeng ti nailistada a kaso ti vehicular traffic accident ita a bulan ti Agosto.
Impetteng daytoy a bimmaba ti kaso ti aksidente sipud nangrugi ti maikatlo a kwarter iti agdama a tawen.
Mainaig iti dayta, iti ekslusibo a pannakiuman ti Bombo Newsteam kenni Pcpt. James Allen Dogao, dadaulo ti Traffic Enforcement Unit ti Baguio City Police Office (BCPO) , inlawlawagna a dimmalan iti umno a proseso ti kaso a pannakadungpar iti 52-anyos a lalaki idiay San Carlos Heights, Irisan, Baguio City no sadino naipilada a dagos ti kaso idi August 6 ken naibalud ti drayber iti agarup lima nga aldaw sakbay a nakapagpyansa daytoy idi Agosto 11, 2026.
Inlawlawagna a ti kaso a reckless imprudence resulting in Homicide ket bailable.
Impeksa pay ni Pcpt. Dogao a kinidawda metten iti Land Transportation Office iti pannaka-issue ti showcause order para iti pannakarevoke ti driver’s license ti driver.
Malaksid iti dayta, naipaayan pay ti driver iti citation tickets kas iti reckless driving ken driving under the influence of liquor kas maiyanatup iti ordinansa ti siudad ti Baguio.
Kagidan dayta, agpalpallagip dagiti dua nga opisyal kadagiti motorista nga agannad dagitoy iti panagmanehoda nangruna no panagtutudo ken liklikanda nga aginom iti nasanger nu agmaneho dagitoy.
Kabayatanna, maipatungpal tupay ti hearing iti korte seknan ti daytoy. //via Bombo Noveh Organo
