BAGUIO CITY – Agrekreklamo dagiti agtagikua ti kabalyo iti Wright Park kontra iti barangay kapitan ti Lualhati Barangay gapu iti maatap a saanna a panangpalubos wenno panangipaay iti barangay clearance para iti application ti business permit dagitoy.
Kasaruno daytoy iti panagparang da Arnel Cayatoc ken Marian Panelo iti Baguio City Council tapnu agkiddaw iti tulong para iti pannakaiproseso ti business permit dagitoy para iti pannakailako dagiti compost products manipod kadagiti rugit ti kabalyo
Sigun kadakuada, naisardeng iti panangilako da iti daytoy gapu iti kinaawan ti barangay clearance da manipod ken Barangay Kapitan Julius Ampal iti Lualhati Barangay.
Sigun pay ken Cayatoc, napondoan ti negosyo dagitoy a panaglako iti compost manipod iti Department of Trade and Industry (DTI).
Gapu iti dayta, ilawlawagna a tarigagayda a mapagbalin kas legal ti negosyoda tapnu maliklikan iti pannakatiliw para iti obstruction ken illegal peddling
Impettengna pay nga awananda iti rason tapnu saanda a maipaayan ti barangay clearance nangruna ta ti City Planning and Development Office (CPDO) ken City Environment and Parks Management Office (CEPMO) ti nangipaay ti permiso kadakuada tapnu mangilako iti compost products iti nasao a parke.
Iti surat nga impatulodda iti konseho, saanda a naipaayan ti barangay clearance gapu ta addan iti dua a kooperatiba nga aglaklako iti compost products.
Nupay kasta, inlawlawag ni Cayatoc a nangrugi dagitoy a nangilako iti compost kabayatan ti kabarbaraan ti pandemya idi 2020 nu sadino dagiti dua a dakdakamaten ti barangay a kooperatiba ket karugrugi da laeng
Naimbitaran met ni Barangay Capt. Ampal tapnu agatendar iti forum ti konseho ngem saan daytoy a nagparang
Gapu iti dayta, inawis ni CEPMO head Atty. Rhenan Diwas, dagiti complainants tapnu agturung iti opisinana tapnu mapagsaritaanda ti nasao a banag
Kabayatanna, dinutukan met ni Vice Mayor Faustino Olowan da Councilors Philian Weygan-Allan ken Elaine Sembrano tapnu tumulong a mang resolbar iti nasao a pakaseknan
[PADAANAN MET TI BENNEG TI MASEKNAN A BARANGAY KAPITAN]
