BAGUIO CITY – Mamati ni out-going Palma Urbano Punong Barangay Alberto Reyes a “misinterpration” ken “misinformation” laeng ti agwarwaras a ladawan iti social media seknan ti maatap a panangiwarasna iti campaign material iti mismo nga aldaw ti barangay ken SK elections.
Immuna iti daytoy, impablaak ni Atty. Lauro Gacayan, asawa ti nangabak a kapitan ti nasao a barangay ti ladawan ni Kapitan Reyes a mangipapaay iti sample ballot ken polyetos.
Iti met eksklusibo a panakipatang ti Bombo Radyo kenni Kapitan Reyes, inlawlawagna a ti kadwana a naala iti ladawan ket mismo a kaanakanna manipod sadiay Metro Manila a nagawid tapnu agbotos iti barangay.
Inlawlawagna a saan nga am-ammo ti kaanakanna dagiti nagkandidato a kagawad isut gapuna nga ipakpakitana ti sample ballot a nakailanadan dagiti supsuportaranna a kagawad.
Impettengna nga awan ti supsuportaranna kadagiti dua a nagkandidato iti kina-kapitan gaputa agpada a pagayamna dagitoy.
Nupay kasta, kinunana a maawatanna ti addang ti anak ti abogado a nangala iti ladawan kontra kadagiti maatap a mangiwarwaras iti campaign materials iti aldaw ti eleksion a maysa kadagiti panaglabsing iti Omnibus Election Code.
Manaig iti daytoy, kinuna a daytoy mismo ti immasideg iti pamilya ni Atty. Cagayan tapnu lawlawaganna ti nasao nga isyu.
Iti agdama ket inikkat metten ti abogado ti impablaak daytoy a ladawan iti social media.
