BAGUIO CITY – Inreklamo ti dua nga ina ti Punong Barangay ti San Vicente ditoy Baguio City gapu iti maatap a panangdangdangran kadakuada ti nasao nga opisyal ti barangay.
Personal a nagturong iti istasyon ti Bombo Radyo – Baguio dagiti nasao nga inna tapnu ireklamo ti maatap a panagkudtar kadakuada ti nasao a kapitan.
Sigun iti maysa nga ina, karamanda kadagiti escavangers wenno dagiti basurero ditoy lokalidad ken kabayatan ti panagkalkalda kadagiti basura idi Lunes, July 22 ket limmabas ti kapitan iti punduan a pagkalkalkalanda iti basura.
Kinunana a sinitar ken binugkawan dagitoy ti kapitan ken inakusaran ti kapitan nga agiwarwarada ti basura.
Dinakamat ti nasao nga ina a kinasaona iti nasayaat a wagas ti kapitan ngem killaat a kinugtaran ti opisyal ti kanawan a luppona ken pinasarunuan pay ti kapitan iti maysa pay a kugtar iti kapada a luppo.
Kalpasanna ket pinmanaw ti kapitan babaen iti taxi a nagluganan daytoy.
Sigun pay iti salaysay ti nasao nga ina, nagturong daytoy ken ti kadwana a maysa metlaeng nga ina iti maysa pay a pagpunduan dagiti basura.
Nadlaw dagiti inna a sinilawan dagitoy ti kapitan agingga nga immasideg ti opisyal iti ayanda iti maikadua a gundaway.
Ditoy a kinugtaran manen ti nasao a kapitan ti bakrang ti maysa pay nga ina ken impangta ti kapitan nga agibarsak ti bato idi nadlawna ti panagala ti nasao nga ina iti video iti inaramidna.
Gapo iti napasamak, nagdesisyon dagiti dua nga inna nga iyuman iti barangay ti nasao nga insidente.
Impeksa dagiti nagreklamo nga inna nga arigna likliklikan dagitoy ti inreklamoda a kapitan gaputa namin-adon a daras a saan a dimmar-ay ti opisyal iti naituding a panagsasaritada kuma iti barangay hall.
Sigun kadagiti dua nga inna, kalpasan nga inyumanda iti barangay ti pakaseknanda ket nagreportda metlaeng iti pulisya tapno maipaayanda iti gundaway a makisarita iti nasao nga opisyal.
Kinunada pay a nagpaipasidong dagitoy iti medico legal ken napaneknekan a nadangranda iti panagkugtar ti nasao a kapitan iti luppo ken bakrang dagitoy.
Insalaysayda a naituding koma nga agtutungtong dagitoy idi Miyerkules, July 24 iti barangay ngem nailaylayon idi Huwebes, July 25 agingga a naituding manen ita nga aldaw ti Lunes, July 29 gaputa sigun iti kapitan ket saanna a masango ti nasao a pakaseknan.
Nupay kasta, namnamaen dagiti dua nga inna a makisarita ti kapitan kadaduada tapno marisot ti reklamoda ken tapno mapagdesisyonanda no agipilada iti kaskenan a kaso.
Ikagkagumaan met ti Bombo Radyo nga alaen ti benneg ti kapitan ti San Vicente Barangay iti ado a daras ngem saan a simmungsungbat iti awag ti istasyon.
Nupay kasta, silulukat ti Bombo Radyo iti aniaman nga oras para iti dasigna tapno malawlawagan ti nasao a reklamo.
