Agtaltalinaed iti heightened alert status ti kapulisan iti pagilian para iti manamnama a panagdudupadop manen dagiti agbiahe pasubli kadagiti trabaho wenno luglugarda kalpasan ti holiday season.
Sigun kenni Philippine National Police (PNP) acting chief Police Lieutenant General Jose Melencio Nartatez Jr., nabilinen dagiti kameng iti pulisya a pagtalinaidenda ti presensyada kadagiti terminal ti bus ken daduma pay a transport hubs nangruna idiay Metro Manila ken daduma pay a key urban areas.
Malaksid kadagiti terminal ti bus, manamnama metlaeng a makita ti presensya dagiti pulis kadagiti highways ken daduma pay a major transportation hubs tapno maipanamnama ti seguridad ken kinatalged dagiti pasahero kasta metten para iti dagus a panagrespondeda kadagiti pakaseknan a mainaig iti linak ken kappia.
Sigun kenni Nartatez, namnamaenda ti adu a lugan ken nailet a gunay ti trapiko kasta metten ti dakkel a posibilidad iti panakapasamak iti road rage.
Gapu iti dayta,imbalakad ti opisyal a ti kasayaatan a banag nga ubraen tapno maliklikan ti panakairaman iti road rage ket ti panangplano a nasayaat iti panagbiahe ken panagbalon iti atiddog a pasensya.
Malaksid iti dayta,mabalbalakadan metlaeng dagiti motorista a siguradwenda ti roadworthiness dagiti imanehoda sakbay dagitoy nga agbiahe.
