BAGUIO CITY – Imbinsa ti Baguio City General Services Office ti pakaseknanda iti basura ita a panawen ti panagtutudo.
Iti interview ti Bombo Radyo Baguio, kinuna ni General Services Officer Eugene Buyucan a parikutda ti panakabasa dagiti basura nangruna ta masapa nga iruar dagiti umili dagiti basurada kadagiti garbage collection point.
Dinakamatna a posible a manayonan ti tipping fee a bayadanda gaputta dumagsen dagiti basura no mabasa dagitoy ken bumassit ti volume dagiti basura a kargaen ti maysa a garbage truck.
Kabayatanna, tinagiragsak ni Buyucan ti panakakissay ti kinaado dagiti basura a makolkolektarda iti agdama.
Dinakamatna a 150 agingga 160 a tonelada ti makolkolektarda a basura ditoy siudad, nababa daytoy no idilig iti 180 agingga 200 a tonelada a nakolektarda idi awan paylaeng ti COVID-19 pandemic.
Mamati a resulta daytoy ti nalimitaran a bilang dagiti turista nga agturturong ditoy Baguio City ken naipawil dagiti dadakkel a selebrasyon kas ti panagbenga festival ken strawberry festival.
Inayonna pay a nakatulong ti agtultultuloy a pangikampanyada iti composting kadagiti basura a nalaka a marunot ken dagiti mabalin pay a maaramat no sadinno kinunana a naobserbaran ti panagtulnog dagiti umili nangruna dagiti addaan iti nalawa a parangan wenno espasyo iti pagtaengan.
Nupay kasta, imbinglay ni Buyucan nga immado dagiti klasen ti basura, malaksid iti sando a bag a pagparparikutanda a maar-aramat agingga iti agdama ket nanayonan ti faceshield ken facemask.
Inlawlawagna met a saanda nga akkem ti panakaibasura dagiti naaramat a personal protective equipements (PPEs) kadagiti ospital gaputa naipabiang daytoy iti Department of Health ken Deparment of Environment and Natural Resources.
