BAGUIO CITY- Nakemmeg ti maysa a karpentero kalpasan a tinagtagbatna ti dua nga estudyante sadiay Bulanao, Tabuk City, Kalinga idi kanikadua.
Nabigbig daytoy a ni Lowie Saliw-an Blanco, 34-anyos, awanan asawa, karpentero ken residente ti Bulanao, Tabuk City bayat a nabigbig dagiti tinagtagbatna a da Kevin Agbulos Pugao, 23-anyos ken Devon Gassinga Dinulong, 19-anyos.
Maibasar iti report, naalarma dagiti biktima idi nagturong iti ruar ti pagnanaedanda ti nabartek nga ading ti maysa kadagiti biktima ken sadiay a nagpukpukkaw iti baet ti panang-anawa ti pagayamna a ni Carter Dinulong.
Simmaruno a simmangpet ti nabartek a suspek a nakaiggem ti buneng ken sadiay a rinaut ken ginandatna a tagbaten ni Dinulong.
Nupay kasta, linapdan dagiti dua a biktima ti suspek ken ginandatda a dis-armaan daytoy ngem dagitoy ti natagtagbat.
Gapu iti daytoy, nagsagrap ni Pugao iti sugat iti likod ti ulo ken iti kanigid a siket bayat a nagsagrap ni Dinulong iti sugat iti kanigid a luppo.
Dagus a naitaray dagitoy iti Kalinga Provincial Hospital bayat a naglibas ti suspek ngem simmuko metlaeng daytoy kadagiti pulis.
