JAPAN – Agtaltalinaed a nasayaat ti kasasaad dagiti Pilipino sadiay Japan kasaruno ti narikna a magnitude 6 a ginggined partiklular iti Fukushima idi laeng kalman, Abril 4.
Iti interview ti Bombo Radyo kenni Vicky Ozawa, Bombo International News Correspondent – Japan, saan unay a narikna ti nasao a panagdayyeg nu sadino saan metlaeng a naipasidong iti tsunami alert ti nasao a lugar.
Sigun kenni Ozawa, ad-adda a naridam ti Japan maipanggep kadagiti ginggined kalpasan ti napasaran idi tawen 2011 a nangitunda iti nakaro a panakadadael dagiti pasdek ken panagtalaw ti kaadwan kadagiti sigud a residente iti nasao a lugar.
Iti agdama, aktibo dagiti maar-aramat a teknolohiya tapno mapakdaaran dagiti residente seknan iti ginggined kas iti panagvibrate dagiti cellphone dagitoy iti kanito a mapaspasamak ti nasao a klase ti didigra, rason a naparpartak met ti panagbakwit dagitoy.
Innayon ni Ozawa nga awan pay ti impaiyulog ti lokal a gobyerno ti Fukushima seknan iti panakaipasardeng ti operasyon iti sektor ti turismo.
Kabayatanna, agtultuloy met ti kinaaktibo ti embahada ti Pilipinas idiay Japan tapno masuportaran dagiti Pinoy nga agnanaed sadiay iti agdama.//Bombo Rob Dominguez
