Imonmonitor ita iti embahada ti Pilipinas idiay Switzerland ti kasasaad dagiti Pilipino sadiay kalpasan ti napasamak nga uram iti maysa nga ski resort partikular idiay Crans-Montana idi laeng January 1.
Kidkiddawen ti embahada kadagiti Pilipino a posible a naapektaran iti nasao nga insidente wenno dagiti kakabagyanda nga addaan iti impormasyon nga umawagda iti embahada.
Impanamnama daytoy a nakasaganada a mangipaay kadagiti kaskenan a tulong kadagiti Pilipino nga agkasapulan.
Kagiddan dayta, impeksa ti embahada ti panakipagladingitda kadagiti pamilya dagiti pimmusay.
Maipalagip a dinosdosena nga indibidwal ti pimmusay bayat nga adda ti nasurok 100 a nadangran gapu iti uram iti nasao a lugar kabayatan ti panakasarabo iti baro a tawen.