BAGUIO CITY – Natalgeden ti kasasaad ti 40-anyos a biktima ti pammagsol a napasamak sadiay Kayang-Hilltop, Baguio City idi kalman, Abril 22.
Sigun kenni PMaj. Harriet Bulcio, pannakangiwat ti Baguio City Police Office, ti suspek ket ti live-in partnerna a 37-anyos, nu sadino agpada nga agnanaed dagitoy iti Unit 305, Synita Building, Kayang St., Baguio City.
Maibasar iti imbestigasyon, naladaw a nagawid ti biktima a rason ti saan a nagkinnaawatan dagitoy agingga a binagsol ti suspek ti biktima.
Sigun kenni PMaj. Bulcio, timmaray ti suspek iti bubong ti pasdek a renrentaanda nu sadino ginandatna a nagturong iti kaabayna a building sakbay a timpuwak daytoy a rason ti ipupusayna.
Kabayatanna, nakasagrap ti dua nga stab wounds ti biktima, maysa iti abaga ken barukong daytoy.
Napag-amwan met a saan a daytoy ti kaunaan a daras a dinangran ti suspek ti biktima.
Naiyawid metten ti bagi ti suspek babaen iti kapamilya daytoy.//Bombo Jez Lapizar
