BAGUIO CITY-Agtaltalinaed a kritikal ti kasasaaad ti balasang a pinaltogan ti saan paylaeng a nabigbig a suspek sadiay Otek Street, siudad ti Baguio itay laeng nabiit.
Immunan a nabigbig daytoy a ni Jenalyn Rosimo, 21-anyos, service crew iti maysa a nalatak a hotel ditoy siudad ti Baguio, residente ti Poblacion, La Trinidad, Benguet ken agturpos kuma a cum laude.
Sigun iti kabsatna a ni Rebecca Rosimo, agingga ita ket ob-obserbaran paylaeng dagiti doktor ti posibilidad a maikkat ti bala iti ulo ti biktima gaputa posible a maapektaran ti utek daytoy.
Kinunana a naparalisa ti kagudua a bagi ti kabsatda isut gapuna a saan daytoy a makagaraw ken makasao.
Innayonna a dakkel unay ti gasgastuenda para iti mechanical ventilation ti kabsatda isut gapuna nga umap-apela para iti tulong pinansial tapnu masustinir ti panakaipasidong ti kabsatda iti nasao a makina.
Naamuan pay kenkuana nga impalubos ti Benguet State University a ti singin ti biktima ti agawat iti medalya ken pammadayaw daytoy kas cum laude iti naangay a graduation ceremony ti unibersidad
