Nakasaganan ti Philippine Red Cross ken Bombo Radyo Baguio para iti umadanin a Dugong Bombo 2024 a maipatungpal idiay Malcolm Square Baguio City ken Km5 Public Market inton November 16.
Sigun kenni kenni Jennelyn M.Terre, OIC-Chapter Administrator iti Red Cross-Baguio, all set aminen dagiti materyales a maaramat inton Sabado.
Gapu iti dayta, guyguyuguyenna amin dagiti umili iti Baguio City nga agidonar iti dara laketdi dagitoy ket agtawen iti 18 agpangato, agdagsen iti 50 kg, addaan iti umdas a turog, hydrated, ken saan a nakainom iti arak.
Innayonna pay a dagiti agdonar iti dara ket mabalin a mailiklik kadagiti cancer producing ailment ken makissayan pay ti timbang ti maysa a tao gapu ta mabawasan ti calories iti uneg ti bagi daytoy.
Malaksid iti dayta, maaddaan ti maysa nga indibidual iti personal health check up sakbay nga agdonar daytoy iti dara.
Mabalin pay a makatulong ti maysa a blood donor tapnu makaisalba daytoy iti tallo agingga uppat a biyag.
Mainaig iti dayta, impakaammo ni Terre nga ita a lawas ket nangipatulod ti Red Cross-Baguio Chapter iti dara kadagiti nagduduma a rehiyon a naapektaran iti panagdalapos dagiti nagsasaruno a bagyo.
Kagiddan dayta, imbinglayna a ti panangdonar iti dara ket saan laeng a makatulong kadagiti umili ti Baguio nu di ket pati kadagiti kabangibang a rehiyon.//Bombo Genzel Depayso
