Kinumpirma ni House prosecutor ken Manila Rep. Joel Chua a pormalen nga inikat ti house prosecution ti bribery case kontra kenni VP Sara.
Iti pannakiuman ti Bombo Radyo kenni Chua, kinunana a ti nasao nga addang ket tapno mapapartak ti mannarimaan a trial ken tapno saanen daytoy a dumanon agingga inton sumaruno a tawen.
Inlawlawagna a daytoy ti napagnunumuanda idi napalabas a lawas kalpasan a naikat ni sigud a senator Antonio Trillanes kas testigo.
Impeksa metlaeng ni Chua a patien ti prosekusyon nga umdasen ti ebidensya nga impresentada isu’t gapunna a saanen a kasapulan nga ituloy ti Article III wenno ti bribery case.
Manamnama met nga ituloy ti prosekusyon ti panangipresentada kadagiti testigo ken dokumento seknan iti Article II pakairamanan dagiti issue seknan iti mapapati nga unexplained wealth ni VP Sara.
Kagidan dayta, pinaglibaka ni Chua ti indikasyon a kinakurang iti ebidensya, rason tapno isanod da ti bribery charge, ken impettengna a kayatda laeng a dagos a malpas ti trial ita a tawen.
Inwaragawagna met a naituding a mangipaay iti opisyal nga statement ni Lead Prosecutor Representative Gerville Luistro seknan iti panangisanod da iti bribery case.